Қазақ әдебиетіне жасындай жарқ етіп құбылыс болып келген Төлеужан Ысмайылов туған ауылда туып, өлеңдегі өз биігіне ұмтылған Бауыржан ағаның қашан да басқадан бәсі биік тұрады. Туған жер, өскен ел, адал достық, мөлдір махаббат, тылсым табиғат сырлары ақын өлеңдерінің негізгі өзегіне айналған.

Санаға сәуле төгіп, жүрекке жылу сыйлаған «Білте шамның жарығы» өткен күнге өзгеше жан бітіріп, кеудедегі сағынышты маздатқандай. Тапа-тал түсте қолына шам ұстап, адам іздеген Диоген сияқты Бауыржан аға да «Білте шамның жарығымен» бойымызда ұмытылып бара жатқан көп адамшылық қасиетімізді, ұлттық құндылықтарымызды қайыра бір еске салып, өлеңмен өрнектеп тұрған сияқты. 

Ақын рухының алтын бесігі – Шыңғыстау. Кеудесіне Абайдан ұшқын алған сөнбейтін сөз алауының отын жағып, келешекке кемел оймен тіл қатады. Хакім су ішкен Қасқабұлақ Бауыржан ақынның да жан сусатар қайнары. Қараша үйдің төрінде қияға қанат қаққан қиял әлемі, күллі тіршілікпен тілдесіп, көркем өлеңге айналғандай. Ақын жырларының ішінде тасқа тұнған тамшыдай тағдыры жатыр.

Бұл жинақты оқығанда жыр қайнарына қанып, Абыралының биігінен өзіндік табиғатымен ерекше бар қазақ даласына көз тастадым, әженің мейіріміне шомдым, әкенің қасиетін таныдым, ананың ыстық алақанын аңсадым. Елінің азаттығын ақ қарға жазған «Абыралы көтерілісіне» терең бойлап, Дегелең деген өр таудың кеудесінен жанын шығарған «Тамыздың жиырма тоғызына» лағынет айттым. Әміренің әнін естіп, Тәттімбеттің күйін тыңдадым.

Аққорада туып, Арқатта білім алып, арман қуып Алматыға аттанған ақынның бүгінде өз биігіне көтерілген қырандай алыстан үн қатқан шағы бұл. Тас бұлақтың суындай шымырлап өмірдің өзінен туған шынайы жырлар оқырманын терең ойға жетелейді. Қасиетті топырақта туып, сол даланың тарихын, күйініші мен сүйінішін өлеңмен өрнектеп, айрықша қолтаңбасын аңдатады.

Әдебиет алыптарының ақ батасын алып, поэзияда өзіңінің дара жолын қалыптастырған Қазақстан Жазушылар Одағы Басқарма төрағасының орынбасары, филология ғылымдарының докторы, профессор, көрнекті ақын Бауыржан Жақыптың «Білте шамның жарығы» жыр жинағы Абай атындағы мемлекеттік сыйлыққа әбден лайық деп санаймын.

Арман Шеризат

ақын, «Дарын» мемлекеттік жастар сыйлығының лаураты